Dayak, Iban Borneo II

Dayak, Iban Borneo II

Sejarah Bansa Dayak, Iban

Sinopsisi Cherita

Bup Dayak, Iban Borneo II chelak keterubah tu tampung Dayak, Iban Borneo I berengkah ari penatai James Brooke ke Sarawak.

Bansa Dayak Iban tu endang seraban bansa ti rindu, keras sereta gagit ati ngiga, berimba lalu diau ba menua baru. Kenyau ari penatai James Brooke lalu nyadi Raja Sarawak 1841 bansa Dayak, Iban disebut Perintah Raja Brooke bansa ti rinduka pengawa ngayau - nyadi perumpak ‘plunders’ di tasik, lanun ‘Pirates’, pengachau ‘trouble makers’. Tegal nya, lalu ditambahka ‘batu api’ ari bala pemesai-pemesai astana Raja Brooke. Perintah Raja Brooke suah nyerang menua bansa Iban di Saribas, Skrang, Batang Ai enggau ti bukai. Udah dichiri nyadi Raja Sarawak kena 29.91841 lalu maduka bala pemesai-pemesai Perintah Raja, nadai urang siku bansa Dayak, Iban nyadi pengari Perintah Raja maya nya. Nya mih kebuah bansa Dayak, Iban enda nemu diri bisi Perintah lalu enggai digumpul pupu @ chukai. Tegal ngelaban atur pupu nya, bansa Dayak, Iban dipetenah sida kumbai lanun, perumpak, pengachau. Perkara ti bendar iya nya, bansa Dayak, Iban ukai munyi ke ti ditulis bansa Orang Putih nya, Bansa Iban ngayau bisi tuju, bisi rasional iya. Dayak Iban enda ngayau orang ti ukai munsuh.

Sebengkah ari perkara ti nunjukka bansa Dayak Iban ukai orang jai (headhunters, plunters, pirates, troubles makers) nya lebuh seraban bala Iban ari Saribas enggau Batang Lupar deka bedagang lalu begigaka (meli) tajau ke menua bukai iya nya penusah Iban dibunuh bansa Murut di Sungai Trusan. Berindik ari penusah tu mih pun kebuah menua Trusan diempu menua Perintah Raja Sarawak taun 1900.

Sebengkah ari perkara ti ngepun Perang Katibas & Sungai Gat Balleh lalu nunjukka bansa Dayak Iban ukai orang jai, iya nya lebuh Balang ti digayang di Pulau Selalu di Sibu. Ninga rita pasal pemarai Balang di Pulau Selalu seberai Pasar Sibu, Enjop sereta bala anak Balang ringat lalu besemaya deka angkat ngelaban Perintah Raja Sarawak laban Balang dibunuh enda nitihka atur undang-undang.

Harry Usup Umbar.(2015). Dayak, Iban Borneo II. Sibu Jaya: Syarikat Sungai Teras.