Dayak, Iban Borneo I

Dayak, Iban Borneo I

Jerita tuai bansa Dayak, Iban

Sinopsis Cherita,

Sebedau bansa Dayak tu sangkai di Borneo, sekeda pemansik madah, asal pun penatai bansa Dayak iya nya ari Yunnan di China enggau Gunung Mensuat di Mekah di Saudi Arabia. Ari menua nya seraban bansa Dayak ti pindah ke kemboja (Indochina) lalu ke Semenanjung Tanah Melayu lalu meraka tasi Melaka ke Sumatra. Ari Sumatra sida pindah ke Pulau Borneo lalu lama diau mendam di Batang Kapuas, Kalimantan Barat begulai enggau Orang Panggau-Gelong di Tembawai Bejuah.

Pengingat tuai ti madah kebuah bansa Dayak ba serak Retai Dai apai Serapoh ti beserara enggau Orang Panggau-Gelong bisi enda sebaka. Taja pia, anak telesak Serapoh nya mih dulu matak bansa Dayak pindah ke menua Sarawak nengah Batang Ai, udah nya ke Batang Lupar (Skrang) lalu ke Saribas (Batang Paku) lalu nyentuk ke serata menua Sarawak, Berunei enggau Sabah. Di Paku di Batang Saribas bansa Dayak ti bejaku ngena jaku Iban berengkah disebut Dayak Iban bepun ari Cherita Tindin “Pimpin Bragah Ngindang” enggau Entinggi “Keti Aur Tulang” (Tuai Baketan)

Dayak Iban tu seraban bansa ti rindu, keras sereta gagit ati berimba bumai bataun ba menua baru. Di menua bari sida Dayak Iban udu dikachau bansa bukai ti dulu agi nguan menua nya. Nya alai kenyau ari jeman Perintah Sultan Berunei nyentuk ke jeman Perintah Raja Brooke bansa Dayak, Iban disebut seraban bansa ti rinduka pengawa ngayau ‘headhunters, perumpak ‘Plunders’, lanun 'Pirates', pengachau ‘trouble makers’… tang kenu ku pansik penulis Bup novel tu empu bansa Dayak Iban mih penyelamat perintis ‘pioneer’ enggau pengaga ‘makers’ menua Perintah Raja Brooke di Sarawak.

Bup novel sejarah ‘Dayak, Iban Borneo I & II ditusun sereta ditulis Harry Usup Umbar bepelasarka pengingat tuai Dayak Iban Kelia ti ayan sebelah majalah, bup, enggau Blog (Internet). Semua informasyen enggau batang cherita nya digumpul iya ngena pansik litericha enggau interbiu kenyau ari taun 200-2013: ditulis ngena stail teknik naratif, dialog, monolog bepelasarka pikir ‘great mind’.

Bup tu udah bisi dijual.

Harry Usup Umbar.(2014). Dayak, Iban Borneo I. Sibu Jaya: Syarikat Sungai Teras.